Hinarap ni Oriental Mindoro Governor Humerlito “Bonz” Dolor at mga kinatawan ng iba-ibang ahensya ng pamahalaan kasama ang kumpanyang nakakuha ng permiso sa gagawing dredging sa Balete river sa bayan ng Gloria ang mga residenteng tutol sa proyekto sa pag-aakalang sand mining ang gagawin.
Kabilang sa humarap sa public consultation ang kinatawan ng Southern Concrete Industries (SCI) na proponent ng dreding, mga kinatawang ng DENR Mimaropa region,EBM-Mimaropa, Mines Geosciences Bureau- Mimaropa ,at DPWH -Mimaropa.
Sa pagharap ni Gov. Dolor sa mga tumututol na mga residente, kanilang ipinaliwanag ang kalahagahan na maisagawa ang dredging sa Balete river upang maiwasan ang pagbaha na isa sa matagal ng problema ng lalawigan ng Oriental Mindoro.
Ayon sa gobernador, barado na ang bunganga ng Balete river kaya kailangan ng mapalalim ito.
Pitong kilometro ng haba ng ilog ang kailangang matanggal ang mga bumarang buhangin para makadaloy ng maayos ang tubig palabas sa dagat.
“ang ulimitate kung goal ay mabigyan ng pinal na tuldok ang problema sa baha sa ibang barangay at yung mga barangay na may potensyal na mangyari hindi ko na hahayaan na dumatin pa sa kanila yung ganoong pagkakataon” sabi ni Dolor.
Pero ang mga residente ng Brgy.Balete,nagpahayag ng pangamba sa ginawang public consultation dahil posibleng maapektuhan ng dredging ang fish sanctuary at ang mga mangrove forest at kapag nagkataon maapektuhan ang kanilang pinagkukunan ng kabuhayan.
“Hindi ako napayag dahil ang ating fish sanctuary sa bayan ng Gloria ay dalawang beses nanalo at nagchampion sa Pilipinas,masisira nay an” sabi ni Rodelio Lambuloto, Bantay Dagat member.
“Paano naman po yung pinaghirapan ng ating mga kababayan sa pagtanim ng bakawan ,ang alam ko po sa batas, pumutol ka ng isang bakawan , malaki po ang magiging kaso mo
pero yung pagkuha ng buhangin at mapipinsala ang puno ng bakawan yun po ba ay ok na lang sa inyo ?” pangamba ni Diomedes Mosquera, dating Brgy. Chairman.
Nangangamba rin ang mga mangingisda na baka mawala ang mga isda dahil sa ingay na lilikhain ng barko na magsasagawa ng dredging.
Pero sabi ni Dolor, may mga inihahanda nang alternatibong kabuhayan ang provincial government katuwang ang Southern Concrete Industries sa loob ng anim na buwan na dreging operation.
“Mga mangingisda sa Balete, huwag kayo mag-ala-ala tutulungan naming ho lahat ng anak ninyo na nag-aarala ng kolehiyo bibigyan natin ng scholarship” pagtiyak ng gobernor.
Umingay ang issue ng dredging sa Oriental Mindoro ilang linggo bago ang halalan matapos magsagawa ng test dredging ang SCI.
Naghinala ang mga residente na ito ay sand mining.
May moratorium ang Oriental Mindoro sa large scale mining.
Pero giit ng Enviromental Management Bureau -Mimaropa at Mines and Geosciences Bureau -Mimaropa, magkaiba ang sand mining at ang dredging.
Ang dredging ay isang uri ng quarrying kung saan ang kinukuha sa ilalim ng mga lawa, ilog ay mga quarry resources gaya ng bato at buhangin para sa construction at engineering work samantalang ang mining naman ay pagkuha ng mineral o yamang mineral na may potensyal na economic value.
Hindi aniya matatawag na mining ang pagkuha ng buhangin sa Balete river dahil ang buhangin dito ay ordinaryong buhangin lamang na angkop lamang bilang panambak.
“hindi po mining ang river dredging, dahil for example ang ginagamit po natin na batas ay sa JMC hindi po yung sa mining law natin which is the RA 7942, may sariling batas po ang dreding natin “ sabi ni Marie Louise Binwag, geologsist ng Mines and Geosciences Bureau- Mimaropa.
Nilinaw din ng SCI na 1.8 million cubic meters lamang ng buhangin ang kukunin sa ilog at hindi 38 million cubic meters gaya ng pinangangambahan ng mga residente.
“Ang RA 7942 po ay base po for mining act and sa amin po sa pag-isyu ng ECC ang guidelines po namin din po ay yung JMC po” sabi naman ni Nicole Yuri V. Dorado, Environmental Management Specialist ng DENR-EMB IVB.
Inamin naman ng SCI na dadalhin ang buhangin na makukuha sa Balete river patungo sa ginagawang airport sa Bulacan.
“Lahat ng ginagawa natin ay batay sa pag-aaral ng mga eskperto ,hindi ito pag-aaral ng mga pribado ,Ang nag-aral nito ay steem geologist ng Mine Geosciences Bureau ,ibig sabihin bago tayo dumating sa araw na ito napakahaba ng pinag-daanan “ sabi pa ni Dolor.
Giit ng provincial government at ng SCI ,dumaan sa mausisng pag-aaral ang gagawing dredging sa Balete river at kumpleto ito ng lahat ng permit.
“Memorandum of agreement with the provincial government ,lahat po ng relevant na government agencies tulad ng DWPH, yung DENR, yung mga sangay niya like EMB , MGB, mayroon po kami environmental compliance certificate na nakuha po namin this year ,mayroon po kami dredging clearance,mayroon kami traders accreditation ,notice to proceed at marami pang iba” sabi ni Engr. Bryan Buenaventura, project coordinator ng SCI.
Ilang beses na rin umano na nagkaroon ng public consultation para sa proyektong dredging pero wala umanong mga dumadalo.
“noong October 2018 ,may public scoping na ginawa dito, public ang announcement ,may public consultation na ginawa sa Balete,bakit hindi umattend yung mga nagtatanong ,bakit yung nagrereklamo ay hindi nag attend ,bakit kung kalian magsisimula na saka tayo naglabasan samantalang anim na taon ang konsultasyon” dagdag pa ng gobernador.
Iginiit pa ng gobernador na aprubdo ng resolusyon mula sa sangguniang barangay, sangguniang bayan at sangguniang panlalawigan ang proyekto.
Nagpahayag naman ng suporta ang ilang residente sa dredging at iginiit na ang mga ipinapakita ng mga tutol na residente na pinsala sa tabing dagat ay matagal ng nangyayari bago pa magkaroon ng testing dredging.
“37 years old na po ako, dito ako naninirahan ,ang nakakasira po sa aming karagatan dito unang-unang ay kalamidad, tulad po ngayon malaki ang alon ,yun pong mga puno na nasisira yun po ang may dahilan hindi po yung pagdating ng barko sa aming barangay” sabi ng residenteng si Dannilyn Herera
Sabi ng gobernador, gagawin din sa pitong ilog pa sa Oriental Mindoro ang dredging para masolusyonan na ang dekada nang problema sa pagbaha.
Nauna lamang umano naaprubahan ang permit ng Balete river sa bayan ng Gloria pero susunod na ang dredging sa mga ilog sa bayan ng Baco na isa sa lagging nalulubog sa baha.
Nilinaw ni gobernor Dolor na legal ang dredging at itutuloy ito para matapos na ang pagbaha pero kung may makikita umano siyang negatibong impact sa kalikasan ay kaniya agad itong ipapatigil.
Pakiusap ni Dolor, bigyan ng tiyansa ang river dredging.
“babantayan ko ho ang project na ito dahil gusto ko maging matagumpay ang proyekto, pakiusap ko lang sa mga nag-aagam-agam pa bigyan nyo ito ng pagkakataon at kapag talagang makakasama ,hindi ninyo na kailangang magreklamo sa akin ,ako ho mismo ang gagalaw, bakit? Mayroon hong inter-agency monitoring team na binuo, ang chairman ho doon ang provincial government ,anytime na makita namin na may epekto ito na makakasira ,hindi ho ako magdadalawang isip ,tigil ito pero kung maganda naman ang mangyayari , bigyan natin ng kaunting pagkakataon” sabi ni Dolor.
Nilinaw pa ni Dolor na walang gagastusin ang provincial government sa dredging ng ilog at sa halip ay kikita pa sa tax kung saan 40 percent ay para sa barangay at tig 30 percent ang municipal government at provincial government.
Wala pang eksaktong petsa kung kalian sisimulan ang dredging sa Balete river na tatagal ng anim na buwan sa oras na mag-umpisa na ang SCI.
Tinututukan nito ang mga usaping pampulitika, panlipunan, at pang-ekonomiya na may direktang epekto sa mamamayan.
Sa pamamagitan ng pagbibigay-diin sa mga tinig ng masa at sa mga isyung hindi kalimitang nabibigyan ng espasyo sa mainstream media, nagsisilbing plataporma ang TBST para sa mas malawak na kamulatan at pagkilos.
- Gov. Dolor: legal ang dredging at kailangan para matapos ang problema sa baha sa Oriental Mindoro - June 21, 2025
- Mag-asawa na sangkot sa Php 5-B investment scam sa Batangas, arestado sa Occidental Mindoro - June 15, 2025
- Bahay ng pulis sa San Jose, Occidental Mindoro,nasunog; 2 aso, nasawi - June 13, 2025
